2 Samuel 1
Iatonna matemo tu Saul sia iatonna sulemo tu Daud untalo to Amalek, torropa tu Daud duangallo dio Ziklag.
Iatonna allo ma’pentallun ta’kala saemi misa’ tau dio mai to’ surodadu nasolan Saul, serek-serekmo tu pakeanna sia ponno barra’-barra’ dao ulunna; tonna rampomo lako Daud, menombami tukku sae rokko padang.
Nakuami Daud lako: Umba munii sae? Mebalimi nakua: Lussu’na’ lan mai to’ surodadu to Israel.
Nakuami Daud lako: Uleleananna’, umbara nakua tu apa dadi. Ma’kadami nakua: Iatu to buda mallaimo dio mai to’ kasirarian sia buda duka tu surodadu tibambang mate dipatei na ia duka tu Saul sola Yonatan, anakna, matemo.
Ma’kadami Daud lako tinde to mangura umbaa kareba iato lako kalena, nakua: Umba mukua untandai tu diona Saul sola Yonatan, anakna, kumua matemo?
Mebalimi tinde to mangura umbaa kareba iato lako, nakua: Siappa’na’ dao buntu Gilboa, ta’kala kutiroi tu Saul sissare lako dokena sia ba’tu pira-pira kareta sia pakkanarang urruku’i.
Messailemi, natirona’, anna tambaina’; kukuami mebali: Io puangku.
Ma’kadami lako kaleku nakua: Mindaroko? Mebalimo’ lako, kukua: Aku te to Amalek.
Ma’kadami lako kaleku, nakua: Maiko pateina’, belanna langga’mo tu kaleku, apa tontong siapa tu ma’pamurru’na.
Kureke’mi lako angku patei, belanna kuissan, kumua ianna songkamo pissan, tae’mo katuoanna. Angku alai tu makota dao ulunna sia iatu ponto lan lengo-lengona; iamote kubaa lako puangku.
Attu iato natoemi Daud tu pakeanna, naserek-serekki; susi dukato tu mintu’ tau nasolan.
Umbatingmi sola nasang sia tumangi’ sia ma’puasa sae lako bonginna diona Saul sia Yonatan, anakna, sia diona mintu’ taunNa PUANG sia mintu’ to Israel, belanna tibambang tu tau iato mai nakande pa’dang.
Nakuami Daud lako tinde to mangura, tu umpokadanni tu kareba iato: Umba munii sae? Mebalimi nakua: Anaknana’ to sae, to Amalek.
Nakuami Daud lako: Ma’apai natae’ iko mumataku’ umpatikambe limammu la ussanggangi tu to Natokko PUANG?
Natambaimi Daud misa’i tu to mangura anna kuanni: Maiko urrokki; narokmi namate.
Nakuami Daud lako: Iatu raramu ma’indo’ dio iko kalemu, belanna pudukmu kalena ussa’biiko, nakua: umpateina’ to Natokko PUANG.
Nabatingimi Daud tu Saul sia Yonatan, anakna, ussa’bu’ bating iate,
mesuami umpa’pangadaranni lako to Yehuda (te nanian) Pana; tonganna iate tisura’ lan Sura’ To malambu’.
O, belo Israel dao buntummu dinii urrokko! A’a tibambangmo tu mintu’ to lalong!
Da’ mipalelei tu iannato dio lu Gat, sia da’ mipatale’i dio lu mintu’ lalan Askelon, da’ anna parannu-rannu tu mintu’ anak dara to Filistin, sia da’ naunnarrak-arrak tu anak dara to tang disunna’!
E kamu buntu Gilboa, kenna da’ora naden ambun ba’tu uran umbissikkomi, e kamu padang dinii urrande pemala’. Belanna inde to dio dinii urruttakki balulang to lalong, iamo balulangna Saul, tu tang diboka’i.
Iake tae’i narara to dipatei ba’tu lompona to lalong, inang tae’ lenpa natibalik tu panana Yonatan, sia iatu pa’dangna Saul tae’ nasule lo’bang.
Iatu Saul sia Yonatan, tu naala penaanna sia nakamasei to buda lan katuoanna, tae’ duka nasitampe lan kamateanna. Mandu ia malinta’ sola duai anna langkan maega sia matoto’ anna singa.
E kamu, anak dara Israel, tangi’i tu Saul tu umpakeikomi sampin karamisi ma’ba’na, tu umpale’ke’i belo bulaan tu pakeammi.
A’a tibambangmo tu mintu’ to lalong lan to’ tananan ra’! Dao bottomu nanii tibambang dirok tu Yonatan.
Belanna iko, e siulu’ku Yonatan, anna bonnong tu penaangku, tarru’ kukamali’ko; iatu kamamaseammi lako kaleku mandu kuangga’ na kamamasean baine.
A’a tibambangmo tu mintu’ to lalong sia pa’demo tu mintu’ pa’buno.